HOME


MEER OOR ONS 

 

'n Dinamiese groep pro-aktiewe inwoners van Potchefstroom neem hulle strate terug, hulle parke, en die toekoms van hulle geliefde universiteitsdorp – en dit in samewerking met die JB Marks Stadsraad.

In wat beskryf kan word as 'n unieke loodsprogram vir voorstede regoor Suid-Afrika, het hierdie plattelandse inwoners oorlog teen rommelstrooiing, leeg-lêery en misdaad in hulle omgewing verklaar. En hulle het die volle steun van die plaaslike owerheid.

Entoesiastiese eienaars, studente, professore, huiseienaars, die polisiedienste en stadsadministrateurs werk saam om al die ongewenste elemente te verwyder om 'n veilige sone van 2 vierkante kilometer rondom die Potchefstroomkampus van die Noordwes-Universiteit te skep. Namate nuwe lede inteken sal die uitbreiding waarskynlik nie net binne die JBM Plaaslike Munisipaliteit wees nie, maar ook na ander munisipaliteite, sowel as die ander twee kampusse van die NWU.

Gemotiveer deur die noodsaak dat 'n veilige omgewing vir studente ook buite die kampus geskep word, was die JB Marks Munisipaliteit en die Noordwes-Universiteit die stigterslede van die Cachet Park City Improvement District (CID) in 2018. Dit is 'n nie-winsgewende maatskappy, gestig in terme van spesiale wetgewing wat voorsiening maak vir bykomende dienste met betrekking tot sekuriteit, vullisbestuur en herwinning, verfraaiing en “ons plek”-making en ander openbare diensfunksies in 'n afgebakende gebied. Die Cachet Park CID funskioneer as operasionele en implemeterings-arm van die JBM Stadsraad.

Die eerste stap in 2019 was die registrasie van lede en die vestiging van ‘n omvattende netwerk kameras. Daar is bewys dat kameras die grootste suksesfaktor in die Universiteit se op-kampus “geen voorvalle”-statistiek is. Om 'n oortreder op die skerm te volg en te identifiseer, ook in die nag, vir kilometers aanmekaar, verseker dat misdaad ontmoedig word en dat misdadigers wat nogtans met hulle misdae probeer voortgaan, aangekeer word. Die Fakulteit Ingenieurswese kyk ook hoe hulle unieke en kompeterende eienskappe by die stelsel kan toevoeg.

Onder leiding van Emeritus Adjunk-Visekanselier, Prof Fika J van Rensburg as HUB, en ondersteun deur Brig (rtd) Kiewiet van Zyl as HOB, en Mev Nadri Zitzke as Senior Rekenmeester, het hierdie CID-inisiatief hulleself gedurende die eerste vyf maande van 2019 gevestig, en is hulle 'n voorbeeld van gemeenskappe wat hande-vat om wet en orde in hulle woonbuurte te herstel. Dit kan 'n innoverende oplossing wees wat as model kan dien om ook elders in Suid-Afrika gevestig te word.

Befondsing is 'n interessante uitdaging. Afgesien van die rentevrye lening deur die CID se ankerlid, die NWU, word die begroting gebalanseer deur die vrywillige ledegelde van eiendoms- en besigheidseienaars in die afgebakende gebied. Bykomende borgskappe en donasies sal aktief gewerf word.

As jy of jou maatskappy hierdie inisiatief wil ondersteun, verneem ons graag van jou. Kontak ons ​​gerus en word deel van hierdie suksesverhaal.

JONGSTE NUUS

07/03/2019

07/03/2019

Die Cachet Park CID het onlangs die tender vir die sekuriteitsdienste in die afgebakende gebied van die groter Bult-area toegeken...